राज्य शासनाचा अंगीकृत सार्वजनिक उपक्रम असलेली एसटी महामंडळ ही सुमारे ८३ हजार कर्मचाऱ्यांची ‘मातृसंस्था’ असून तिचे खासगीकरण होणार नाही, अशी ग्वाही परिवहन मंत्री तथा एसटी महामंडळाचे अध्यक्ष प्रताप सरनाईक यांनी दिली. कर्मचाऱ्यांनी खासगीकरणाच्या अफवांवर विश्वास ठेवू नये, असे आवाहनही त्यांनी यावेळी केले.

मुंबईतील परळ बसस्थानकात राष्ट्रीय एसटी कामगार काँग्रेसतर्फे कर्मचारी व प्रवाशांसाठी जलशीतकाच्या लोकार्पण कार्यक्रमात ते बोलत होते. या उपक्रमाची संकल्पना कामगार नेते भाई जगताप यांची असून, सरचिटणीस श्रीरंग बर्गे यांच्या पुढाकाराने हा उपक्रम राबविण्यात आला.