महाराष्ट्र परिवहन विभागाच्या कारभारात एक ऐतिहासिक क्षण पाहायला मिळाला. राज्याचे परिवहन मंत्री प्रताप सरनाईक यांच्या हस्ते १५९ मोटार वाहन निरीक्षकांच्या ऑनलाईन बदल्यांचे अनावरण करण्यात आले. ही प्रक्रिया पूर्णपणे संगणकीकृत पद्धतीने पार पडली असून, यात कोणत्याही मानवी हस्तक्षेपाशिवाय पारदर्शकतेचा आग्रह ठेवण्यात आला आहे.

या बदल्या ऑनलाईन पद्धतीने केल्यामुळे विभागातील कार्यक्षमता वाढणार असून, अधिकाऱ्यांना त्यांच्या क्षमतेनुसार योग्य ठिकाणी नेमणूक दिली जाणार आहे. तसेच, नागरिकांना सेवासुविधा अधिक प्रभावीपणे मिळतील, असा विश्वास परिवहन विभागाने व्यक्त केला आहे.

परिवहन मंत्री प्रताप सरनाईक यांनी यावेळी सांगितले की, “हे पाऊल म्हणजे शासनाच्या ‘डिजिटल इंडिया’ आणि ‘सुशासन’ या संकल्पनांच्या दिशेने एक ठोस प्रयत्न आहे. बदली प्रक्रियेत पारदर्शकता आणि निष्पक्षता राखण्यासाठी ऑनलाईन प्रणालीचा वापर हा काळाची गरज आहे.”

हा उपक्रम भविष्यात इतर शासकीय विभागांसाठीही प्रेरणादायक ठरेल, अशी अपेक्षा आहे.