ढोकी आणि परिसरात मकर संक्रांतीच्या दिवशी एक आगळावेगळा “खास कार्यक्रम” पाहायला मिळाला. हा कार्यक्रम होता – विजेच्या खेळखंडोबाचा! सकाळी दहा वाजता गायब झालेली वीज दिवसभर गायबच राहिली, आणि गावात अंधाराचे साम्राज्य पसरले.

वाखरवाडीच्या मारुती मंदिर, विठ्ठल – रुक्मिणी मंदिरात हळदी-कुंकवाचा कार्यक्रम सुरू असताना अचानक वीज गायब झाली, आणि महिलांनी अंधारातच कार्यक्रम पार पाडला. “सणाचा उत्साह नेमका कुणाच्या वीज योजनेत हरवला?” असा सवाल त्यांनी उपस्थित केला. मंदिराचा अंधार पाहून काहींनी थेट दिवे लावण्याचा विचार केला, तर काहींनी “मोबाईल फ्लॅशलाइट”वरच समाधान मानले.

याला कारण विचारण्यासाठी महिलांनी थेट एमएससीबीचा संपर्क साधला. पण, एमएससीबीच्या कार्यालयाकडून मिळालेले उत्तर म्हणजे “डोळा मारला आणि फोन ठेवा.”

गावातील एका चतुर महिलेने उपरोधात्मक टिप्पणी केली, “एमएससीबीचे हे ‘सण स्पेशल’ आहे का? का वीज गेल्यावर आम्हाला ‘साक्षात अंधाराचा’ अनुभव देऊन सांस्कृतिक पर्यटन घडवायचं आहे?”

विजेचा खेळखंडोबा कधी संपणार? की सणासुदीला हीच अंधाराची साथ पुढेही कायम राहणार? असा सवाल सध्या गावकरी विचारत आहेत.