तुळजापूर : काश्मीरमध्ये दहशतवाद्यांविरोधात लढताना अदम्य धैर्य दाखवणारे निवृत्त लेफ्टनंट कर्नल मनोजकुमार सिन्हा यांनी श्री तुळजाभवानी देवीचे दर्शन घेतले. यावेळी श्री तुळजाभवानी मंदिर समितीच्या वतीने पब्लिक रिलेशन ऑफिसर अभिजीत खेडकर यांनी त्यांचा सत्कार केला.या प्रसंगी पुजारी मंडळाचे माजी अध्यक्ष किशोर गंगणे, हिंदू जनजागृती समितीचे श्रीराजन बुणगे, चेतन देशमाने आदी उपस्थित होते.
निवृत्त लेफ्टनंट कर्नल मनोजकुमार सिन्हा यांनी काश्मीरमध्ये दहशतवाद्यांविरोधात लढताना अद्वितीय शौर्य दाखवले आहे. त्या संघर्षादरम्यान त्यांच्या हनुवटीला गोळी लागून ती मानेतून आरपार गेली, तरीही त्यांनी राष्ट्ररक्षणाचे कर्तव्य अबाधित ठेवत लढा सुरूच ठेवला. त्यांच्या या पराक्रमाबद्दल भारतीय सेनेकडून त्यांना सेवा मेडल आणि वीरता मेडल प्रदान करण्यात आले आहे.
सध्या ते देशभरातील युवकांना एकत्रित करून क्षात्रतेज निर्माण करणे तसेच धर्माच्या आधारावर संघटन करताना समाजमाध्यमांवरील फेक आणि नकारात्मक प्रचाराला कशाप्रकारे प्रत्युत्तर द्यावे, याबाबत मार्गदर्शन करत आहेत.