तुळजापूर : श्री आई तुळजाभवानी मंदिरात आज रंगपंचमीचा उत्सव मोठ्या उत्साहात आणि पारंपरिक पद्धतीने साजरा करण्यात आला. रंगपंचमीच्या निमित्ताने देवीची विशेष पूजा करून पारंपरिक पद्धतीने देवीला रंग अर्पण करण्यात आले.

सकाळी अभिषेक पूजनानंतर श्री तुळजाभवानी मातेला पांढराशुभ्र शालू नेसविण्यात आला. त्यानंतर त्या पांढऱ्या शालूवर सप्तरंगांची उधळण करून रंगपंचमीचा उत्सव साजरा करण्यात आला. महंत व पुजाऱ्यांनी देवीला रंग लावून मंदिर परिसरात भक्तिमय वातावरणात हा सोहळा पार पडला.

रंगपंचमीच्या दिवशी देवीची विशेष पूजा करून तिला रंग लावण्याची प्राचीन परंपरा आहे. त्यानंतर पुजारी व भाविक एकमेकांना रंग लावून आनंद व्यक्त करतात. या उत्सवात प्रामुख्याने नैसर्गिक रंगांचा वापर करण्यात येतो.

यावेळी महंत वाकोजी बुवा, महंत हमरोजी बुवा, सहायक व्यवस्थापक (धार्मिक) अमोल भोसले, पुजारी बांधव तसेच मंदिर संस्थानचे अधिकारी व कर्मचारी उपस्थित होते.