धाराशिव | विश्व प्रशांत न्यूज.

अंतरवाली सराटी येथे मनोज जरांगे पाटील यांच्या सुरू असलेल्या उपोषणाची धग राज्यभर पोहोचत असतानाच धाराशिव तालुक्यातील खामगाव येथील विलास सुरेश शिनगारे (वय ३०) या युवकाचा मृत्यू झाल्याची घटना समोर आली आहे. या घटनेमुळे परिसरात हळहळ व्यक्त होत असून, विलास यांच्या मृत्यूचा संबंध मराठा आरक्षण आंदोलनामुळे निर्माण झालेल्या मानसिक तणावाशी असल्याची चर्चा नागरिकांमध्ये सुरू आहे. मात्र, या कारणाची अधिकृत पुष्टी अद्याप झालेली नाही.

विलास शिनगारे हे व्यवसायाने मोटार मेकॅनिक होते. मराठा आरक्षणाच्या आंदोलनात त्यांचा सक्रिय सहभाग होता. त्यांनी अंतरवाली सराटी येथे जाऊन मनोज जरांगे पाटील यांची भेट घेतली होती. तसेच मुंबईतील आंदोलनासह स्थानिक पातळीवरील सभा, बैठका आणि विविध आंदोलनांमध्येही ते सहभागी झाले होते.

मनोज जरांगे पाटील यांच्या प्रकृतीबाबत चिंता व्यक्त होत असताना आणि सरकारकडून मागण्यांकडे दुर्लक्ष होत असल्याचा आरोप होत असतानाच ही घटना घडल्याने मराठा समाजात अस्वस्थता निर्माण झाली आहे. आज मराठा संघटनांकडून धाराशिव बंदची हाक देण्यात आलेली असतानाच विलास यांच्या मृत्यूची बातमी समोर आल्याने आंदोलनाला आणखी भावनिक पार्श्वभूमी मिळाली आहे.

विलास यांच्या निधनाने त्यांच्या कुटुंबावर दुःखाचा डोंगर कोसळला आहे. त्यांच्या पश्चात आई-वडील, भाऊ-भावजय आणि दोन बहिणी असा परिवार आहे.

दरम्यान, या दुर्दैवी घटनेचे नेमके कारण अधिकृत तपासातून स्पष्ट होणे आवश्यक असून, कोणत्याही निष्कर्षापूर्वी प्रशासनाच्या तपासाची प्रतीक्षा करणे महत्त्वाचे आहे. मात्र, या घटनेने मराठा आरक्षणाच्या प्रश्नावर सुरू असलेल्या आंदोलनाची गंभीरता आणि समाजातील अस्वस्थता पुन्हा अधोरेखित झाली आहे.