तुळजापूर : श्री तुळजाभवानी मंदिर संस्थानकडून होळी (शिमगा) सण व चंद्रग्रहणाच्या पार्श्वभूमीवर मंदिरातील पूजा विधींच्या वेळापत्रकाबाबत महंत, पुजारी, सेवेकरी व भाविक भक्तांना जाहीर सूचना देण्यात आली आहे.

मंदिर प्रशासनाने दिलेल्या माहितीनुसार, दि. २ मार्च २०२६ (सोमवार) रोजी होळी सणानिमित्त अभिषेक पूजेची घाट सायंकाळी ६.०० वाजता होईल. त्यानंतर रात्री ८.०० वाजता आरती व धुपारती करण्यात येणार आहे. संबंधितांनी याची नोंद घ्यावी, असे आवाहन करण्यात आले आहे.

तसेच दि. ३ मार्च २०२६ (मंगळवार) रोजी सायंकाळी होणाऱ्या चंद्रग्रहणामुळे श्री देवींच्या पूजा विधींमध्ये विशेष बदल करण्यात आला आहे. जाहीर करण्यात आलेल्या वेळापत्रकानुसार —

सायंकाळी ६.१५ ते ६.४० या वेळेत घाट देणे, पुजेस हाक मारणे, पुजारी श्रीदेवीजवळ येणे व निर्माल्य विसर्जन करण्यात येईल.

६.४४ ते ६.४८ या वेळेत चंद्रग्रहण कालावधीत श्रीदेवींना सोवळ्यात ठेवण्यात येणार आहे.

त्यानंतर सायंकाळी ६.५५ ते रात्री ९.०० या वेळेत सिंहासन पूजा, पंचामृत स्नान, शुद्धस्नान, आरती व धुपारती होईल.

ही सूचना तुळजाभवानी मंदिर संस्थानचे तहसीलदार तथा व्यवस्थापक (प्रशासन) अरविंद बोळंगे यांनी जारी केली असून सर्व भाविकांनी व संबंधितांनी त्याची नोंद घ्यावी, असे आवाहन करण्यात आले आहे.