पुणे : राज्यात वाढत चाललेल्या कोयता गँगच्या दहशतीवर कठोर कारवाई करण्याचे आदेश देत उपमुख्यमंत्री अजित पवार यांनी पोलिस प्रशासनाला स्पष्ट शब्दांत सुनावले. “गाड्या देतोय, घोडे देतोय; पण रस्त्यावर कोयता गँग दिसता कामा नये,” असा थेट इशारा त्यांनी दिला.

पोलिस दलाला आवश्यक ती वाहने, साधनसामग्री आणि मनुष्यबळ शासनाकडून उपलब्ध करून देण्यात येत आहे. त्यानंतरही जर दहशत माजवणाऱ्या टोळ्या, शस्त्रसज्ज तरुणांचे गट रस्त्यावर फिरत असतील, तर ते कायद्याच्या अंमलबजावणीत झालेलं अपयश मानलं जाईल, असे अजित पवार यांनी ठणकावून सांगितले.

सार्वजनिक ठिकाणी शस्त्र बाळगणे, टोळक्यांद्वारे दहशत निर्माण करणे किंवा कायदा हातात घेणाऱ्यांवर कसलाही दबाव न घेता कठोर कारवाई करा, अशा स्पष्ट सूचना त्यांनी दिल्या. नागरिकांच्या सुरक्षिततेशी तडजोड खपवून घेतली जाणार नाही, असा कडक संदेश या वक्तव्यातून देण्यात आला आहे.

राज्यात कायदा-सुव्यवस्था अबाधित ठेवण्यासाठी पोलिसांनी शून्य सहनशीलतेची भूमिका घ्यावी, असेही उपमुख्यमंत्र्यांनी नमूद केले.