प्रशांत शशिकांत मतेंमुंबई -: पत्नीच्या छळाला कंटाळून पतीने गळफास घेत आत्महत्या केल्याची घटना समोर आली आहे. निशांत त्रिपाठी (वय- ४२) असे आत्महत्या केलेल्या तरुणाचे नाव आहे. निशांतने कंपनीच्या वेबसाईटवर सुसाईड नोट अपलोड केली आहे. त्यामध्ये त्याने पत्नी आणि तिच्या नातेवाईकावर ठपका ठेवला आहे. ही घटना (दि.२८) विलेपार्ले येथील सहारा हॉटेलमध्ये घडली.
पोलिसांनी दिलेल्या माहितीनुसार, निशांतने आत्महत्येच्या तीन दिवस आधी हॉटेलमध्ये रूम बुक केली होती. ज्या दिवशी निशांतने आत्महत्या केली, त्या दिवशी त्याने आपल्या खोलीबाहेर ‘डू नॉट डिस्टर्ब’ असा फलकही लावला होता. मात्र बराच वेळ त्याने खोलीचा दरवाजा न उघडल्याने हॉटेल कर्मचाऱ्यांनी दुसऱ्या चावीने खोलीचा दरवाजा उघडला असता निशांतचा मृतदेह खोलीत गळफास घेतलेल्या अवस्थेत आढळून आला.
त्यानंतर त्यांनी पोलिसांना माहिती दिली. तपासादरम्यान पोलिसांना एक सुसाईड नोट सापडली. ही सुसाईड नोट निशांतने मृत्यूपूर्वी आपल्या कंपनीच्या वेबसाईटवर अपलोड केली होती. त्याने आपल्या मृत्यूला पत्नी आणि मावशीला जबाबदार धरले.
निशांतने सुसाईड नोटमध्ये म्हंटले आहे की , ” हाय बेव, तू हे वाचशील तोपर्यंत मी निघून गेलो असेल. जे काही झालं त्याबद्दल मी तुझा शेवटच्या क्षणापर्यंत द्वेष करु शकलो असतो. पण, मी या क्षणी प्रेमाची निवड केली आहे. मी तुझ्यावर तेव्हाही प्रेम करत होतो. मी तुझ्यावर आजही प्रेम करतो. मी वचन दिलंय त्याप्रमाणे हे प्रेम कधीही कमी होणार नाही. मी किती संघर्ष केलाय हे माझ्या आईला माहिती आहे. तू आणि प्रार्थना मावशीच माझ्या मृत्यूचं कारण आहेत. त्यामुळे मी तुझ्याकडे भीक मागतो, माझ्या आईकडं जाऊ नकोस. ती कोसळली असेल. तिला एकटीनं शोक व्यक्त करु दे ” असा आशय यामध्ये मांडलेला आहे.
दरम्यान, या घटनेनंतर मृत निशांतच्या आईने मुंबई विमानतळ पोलिसांकडे तक्रार दाखल केली आहे. निशांतची पत्नी अपूर्वा पारिख आणि तिची मावशी प्रार्थना मिश्रा यांच्याविरोधात बीएनएस कलम १०८ अन्वये तक्रार दाखल केली आहे.
