जायकवाडीतून चार पाणी आवर्तने मंजूर; ५ नोव्हेंबरपासून पहिले आवर्तन!

धाराशिव (प्रतिनिधी) : जायकवाडी धरणातून रब्बी हंगामासाठी तीन आणि उन्हाळी हंगामासाठी एक, अशी एकूण चार पाणी आवर्तने मंजूर करण्यात आली असून, पहिले आवर्तन ५ नोव्हेंबरपासून सुरू करण्याचा महत्त्वपूर्ण निर्णय घेण्यात आला आहे.
छत्रपती संभाजीनगर येथील विभागीय आयुक्त कार्यालयात जलसंपदामंत्री ना. राधाकृष्ण विखे पाटील यांच्या अध्यक्षतेखाली झालेल्या कालवा सल्लागार समितीच्या बैठकीत हा निर्णय घेण्यात आला. या बैठकीस मराठवाडा पदवीधर मतदारसंघाचे नवनिर्वाचित आमदार डॉ.प्रतापसिंह पाटील उपस्थित होते.
शेतकऱ्यांच्या रब्बी पिकांना वेळेवर पाणी मिळावे, कालव्याच्या शेवटच्या टोकापर्यंत पाणी पोहोचावे आणि पाणीवाटपात कोणत्याही भागावर अन्याय होऊ नये, यासाठी प्रभावी नियोजन करण्याची आवश्यकता त्यांनी व्यक्त केली.
माजी मंत्री आ.राजेश टोपे यांच्या सह डॉ. प्रतापसिंह पाटील यांनी पाच पाणी आवर्तने देण्याची मागणी लावून धरली असून, सध्या चार आवर्तने मंजूर झाली आहेत. जानेवारी महिन्यात पाणीसाठ्याचा फेरआढावा घेतल्यानंतर पाचव्या आवर्तनासाठीही शासनाकडे पाठपुरावा करण्यात येणार आहे.
“शेतकऱ्यांच्या प्रश्नाला पक्षीय राजकारणाची किनार न देता त्यांच्या हक्काचे पाणी शेतापर्यंत पोहोचणे महत्त्वाचे आहे. मंजूर आवर्तनांची प्रभावी अंमलबजावणी आणि अतिरिक्त आवर्तनासाठी आमचे प्रयत्न कायम राहतील,”अशी भूमिका आ. डॉ.प्रतापसिंह पाटील यांनी बैठकीत व्यक्त केली.
या बैठकीस लोकसभा सदस्य,विधानसभा सदस्य व विधान परिषद सदस्य यांच्यासह इतर समिती सदस्य व जलसंपदा विभागाचे वरिष्ठ अधिकारी उपस्थित होते.