कळंब तालुक्यातील प्रमुख पदाधिकाऱ्यांकडून अभिनंदन; पक्षवाढीसाठी एकजुटीने काम करण्याचे आवाहन..

धाराशिव (प्रतिनिधी) राष्ट्रवादी काँग्रेस पक्षाच्या धाराशिव जिल्हाध्यक्षपदी नवनियुक्त झाल्याबद्दल श्री. सचिन तावडे यांचा कळंब तालुक्यातील राष्ट्रवादी काँग्रेस पक्षाच्या प्रमुख पदाधिकाऱ्यांच्या वतीने सत्कार करून अभिनंदन करण्यात आले. यावेळी त्यांना पुढील राजकीय व संघटनात्मक वाटचालीसाठी शुभेच्छा देण्यात आल्या.
याप्रसंगी बोलताना नवनियुक्त जिल्हाध्यक्ष सचिन तावडे यांनी आगामी काळात कळंब तालुक्यासह संपूर्ण धाराशिव जिल्ह्यात राष्ट्रवादी काँग्रेस पक्षाची संघटनात्मक बांधणी अधिक मजबूत करण्यावर विशेष भर देणार असल्याचे सांगितले. पक्षाचे विचार, ध्येयधोरणे आणि सर्वसामान्य जनतेचे प्रश्न तळागाळापर्यंत पोहोचविण्यासाठी पदाधिकारी व कार्यकर्त्यांना सोबत घेऊन काम करणार असल्याचा निर्धारही त्यांनी व्यक्त केला.