तुळजापूर – महाराष्ट्राची कुलस्वामिनी श्री तुळजाभवानी मातेच्या चरणी पुण्यातील पिंपळे गुरव येथील एका भाविकाने अर्धा किलो वजनाचे चांदीचे दागिने (वाहिक) अर्पण करत आपली अढळ श्रद्धा व्यक्त केली आहे. या दागिन्यांमध्ये एका सुबक चांदीच्या मुकुटासह देवीसाठी खास घडवलेल्या कानातील माशांचा समावेश आहे.

पुण्यातील पिंपळे गुरव परिसरातील रहिवासी असलेले भाविक दिगंबर बसवंतराव बिरादार हे श्री तुळजाभवानी देवीच्या दर्शनासाठी आज तुळजापुरात आले होते. देवीचे विधीवत आणि मनोभावे दर्शन घेतल्यानंतर त्यांनी कृतज्ञता व्यक्त करत, देवीच्या चरणी हे अर्धा किलो वजनाचे चांदीचे दागिने अर्पण केले.

दिगंबर बिरादार यांनी केलेल्या या भक्तीपूर्ण अर्पणाबद्दल श्री तुळजाभवानी मंदिर संस्थानच्या वतीने त्यांचा शाल आणि श्रीफळ देऊन यथोचित सत्कार करण्यात आला. याप्रसंगी विकास वाणी, महेश गंजे, सूरज घुले यांच्यासह मंदिर संस्थानचे इतर अधिकारी आणि कर्मचारी उपस्थित होते. देवीच्या चरणी नतमस्तक होत बिरादार यांनी केलेल्या या दातृत्वाची मंदिर परिसरात चर्चा होती.