रुईभर : येथील श्री दत्त मंदिर संस्थान, रुईभर यांच्या वतीने मंदिराच्या धार्मिक परंपरेतील महत्त्वाचा टप्पा मानल्या जाणाऱ्या भव्य कलशारोहण सोहळ्याचे आयोजन शुक्रवार, दि. २० फेब्रुवारी २०२६ रोजी सकाळी १० वाजता करण्यात आले आहे. या सोहळ्याच्या पार्श्वभूमीवर संपूर्ण रुईभर परिसरात भक्तिमय आणि उत्साहाचे वातावरण निर्माण झाले आहे.

कलशारोहण सोहळ्यापूर्वी गुरुवार, दि. १९ फेब्रुवारी २०२६ रोजी सकाळी ९ वाजता आयोजित भगवत सप्ताहाची सांगता होणार असून, त्यानिमित्त रुईभर नगरीत भव्य ग्रंथदिंडी मिरवणूक काढण्यात येणार आहे. या मिरवणुकीदरम्यान हेलिकॉप्टरद्वारे पुष्पवृष्टी करण्यात येणार असून, हा कार्यक्रम भाविकांसाठी विशेष आकर्षण ठरणार आहे.

कार्यक्रमासाठी बाहेरगावाहून मोठ्या संख्येने भाविक उपस्थित राहण्याची शक्यता लक्षात घेता, मिरवणुकीदरम्यान नागरिकांनी आपल्या मौल्यवान वस्तू व वैयक्तिक सामानाची स्वतः काळजी घ्यावी, असे आवाहन श्री दत्त मंदिर संस्थान, रुईभर यांच्या वतीने करण्यात आले आहे.

धार्मिक परंपरा, सामूहिक भक्ती आणि सांस्कृतिक एकात्मतेचे प्रतीक ठरणाऱ्या या भव्य सोहळ्यास गावातील तसेच परिसरातील भाविकांनी मोठ्या संख्येने उपस्थित राहावे, असे आवाहन आयोजकांनी केले आहे.