धाराशिव – जिल्हा परिषद व पंचायत समिती सार्वत्रिक निवडणूक २०२६ च्या अनुषंगाने १९ जानेवारी रोजी जिल्हाधिकारी कार्यालयातील निवासी उपजिल्हाधिकारी यांचे कक्षात राजकीय पक्षांचे अध्यक्ष व प्रतिनिधींची बैठक निवासी उपजिल्हाधिकारी विद्याचरण कडवकर यांच्या अध्यक्षतेखाली संपन्न झाली.या बैठकीला बहुजन समाज पार्टीचे जिल्हाध्यक्ष प्रा.महादेव वाघमारे,राष्ट्रवादी काँग्रेस पार्टी (शरद पवार गट) चे सतीश मातने,बसपाचे तुकाराम गवळी,राजपाल देशमुख,आकाश चौधरी दादा पाटील, एमसीएमसी नोडल अधिकारी विवेक खडसे,तहसीलदार (सामान्य),प्रकाश व्हटकर व नायब तहसीलदार सचिन पाटील यांची उपस्थिती होती.

श्री.कडवकर यांनी जिल्हा परिषद व पंचायत समितीच्या सार्वत्रिक निवडणुकीच्या अनुषंगाने आदर्श आचारसंहिता लागू झाली असून निवडणूक कार्यक्रमाची सर्वसाधारण माहिती उपस्थित पदाधिकाऱ्यांना दिली.

निवडणूक कार्यक्रमाचा तपशील व कार्यक्रमाचा दिनांक,निवडणूक निर्णय अधिकारी व सहायक निवडणूक अधिकारी,निवडणूक काळात काय करावे व काय करू नये,विविध कक्ष व त्यांचे नोडल अधिकारी,सुरक्षा कक्ष व मतमोजणीचे ठिकाण,प्रचारासाठी सर्वसाधारणपणे लागणारे विविध परवाने,विविध परवाने सुलभरित्या प्राप्त होण्यासाठी सर्व निवडणूक निर्णय अधिकारी यांचे कार्यालयात एक खिडकी कार्यान्वित करण्यात आली असल्याची माहिती श्री.कडवकर यांनी उपस्थित राजकीय पक्षांच्या प्रतिनिधींना दिली.