परंडा तालुक्यातील राष्ट्रीय स्वयंसेवक संघात अनेक वर्षांपासून सक्रियपणे कार्यरत असलेले कार्यकर्ते श्री. लक्ष्मण सौदागर गोरे राहणार करंजा यांनी येणारी पंचायत समिती निवडणूक वडनेर गणातून लढवण्याची इच्छा जाहीर केली आहे.
गेल्या 15 वर्षांपासून राष्ट्रीय स्वयंसेवक संघात त्यांनी आतापर्यंत तालुका संपर्क प्रमुख, तालुका कार्यवाह, जिल्हा कार्यकारिणी सदस्य, तालुका जागरण गट प्रमुख अशा विविध जबाबदाऱ्या सांभाळल्या आहेत. या कार्यातून सामाजिक जीवनाची सुरुवात करून, युवक संघटन, आरोग्य जनजागृती, रोजगार व क्रीडा क्षेत्रात त्यांनी सातत्याने काम केले आहे. “समाजहित, पारदर्शकता आणि विकास” हे ब्रीद घेऊन पंचायत समिती स्तरावर सामान्य नागरिकांच्या प्रश्नांना प्राधान्य देत प्रभावी काम करण्याचा त्यांचा संकल्प आहे.
ग्रामीण भागातील शिक्षण, आरोग्य सुविधा, युवकांसाठी रोजगाराभिमुख उपक्रम, महिलांचे सक्षमीकरण व शेतकऱ्यांचे प्रश्न यावर ठोस काम करण्याचा निर्धार त्यांनी व्यक्त केला. संघ परिवारातील शिस्त, निःस्वार्थ सेवा व राष्ट्रप्रथम मूल्यांच्या आधारावर जनतेचा विश्वास संपादन करून पंचायत समितीत सकारात्मक बदल घडवून आणण्याचा मानस त्यांनी बोलून दाखवला. लोणी जिल्हा परिषद गटात राष्ट्रीय स्वयंसेवक संघाचे संघटन पण मजबूत आहे.
लवकरच तालुक्यातील विविध सामाजिक घटकांशी संवाद साधून व्यापक जनसंपर्क अभियान राबवण्यात येणार असल्याची माहितीही त्यांनी दिली.