बार्शी : बार्शीतील पंकज नगर भागात बेकायदेशीरपणे राहत असलेल्या सहा बांगलादेशी नागरिकांविरुद्ध बार्शी पोलिसांनी तातडीने कारवाई करून त्यांना ताब्यात घेतलं आहे. या नागरिकांकडे भारतात राहण्यासाठी आवश्यक असलेली कोणतीही कायदेशीर कागदपत्रे नव्हती.

ही कारवाई पोलीस अधीक्षक अतुल कुलकर्णी यांच्या मार्गदर्शनाखाली आणि बार्शी शहर पोलीस स्टेशनचे निरीक्षक बालाजी कुकडे यांच्या नेतृत्वाखाली करण्यात आली. दहशतवाद विरोधी पथक आणि सोलापूर ग्रामीण शाखेच्या अधिकाऱ्यांनी या प्रकरणात महत्त्वाची भूमिका बजावली.

पकडलेल्या नागरिकांमध्ये 2 पुरुष आणि 4 महिला आहेत. त्यांच्याविरुद्ध बार्शी शहर पोलीस ठाण्यात गुन्हा दाखल करण्यात आला आहे. या प्रकरणाचा पुढील तपास पोलीस उपनिरीक्षक उमाकांत कुंजिर करत आहेत.