तुळजापूर / अणदूर 

आधीच भीषण दुष्काळाचे संकट, त्यात हातातोंडाशी आलेल्या उसाच्या पिकावर आगीचा घाला! तुळजापूर तालुक्यातील अणदूर येथे शॉर्टसर्किटमुळे लागलेल्या आगीत तीन शेतकऱ्यांचा तब्बल सात एकर ऊस जळून खाक झाला. शुक्रवार, दि. १३ नोव्हेंबर रोजी दुपारी तीनच्या सुमारास घडलेल्या या दुर्घटनेत लाखो रुपयांचे नुकसान झाल्याचा अंदाज असून तीन शेतकरी कुटुंबांवर मोठे आर्थिक संकट कोसळले आहे.

अणदूर शिवारातील शिवराज कुताडे, लक्ष्मण हागलगुंडे आणि श्याम कुताडे यांच्या शेतातील उसाला शॉर्टसर्किटमुळे आग लागल्याचे सांगण्यात येत आहे. काही क्षणांतच आगीने रौद्र रूप धारण केले. शेजारील शेतकऱ्यांनी आग विझविण्यासाठी शर्थीचे प्रयत्न केले; मात्र आगीचा वेग इतका प्रचंड होता की, डोळ्यादेखत सात एकरांतील ऊस जळून राख झाला.

आधीच दुष्काळाने शेतीचे आर्थिक गणित कोलमडलेले असताना नगदी पीक असलेला ऊस आगीत भस्मसात झाल्याने शेतकऱ्यांच्या हातातोंडाशी आलेला घास हिरावला गेला आहे. वर्षभर केलेले कष्ट, खर्च आणि उत्पन्नाच्या अपेक्षा क्षणात राख झाल्याने तिन्ही शेतकरी हतबल झाले आहेत. या घटनेने परिसरातील शेतकरी आणि ग्रामस्थांमधून हळहळ व्यक्त होत आहे.

शेतकऱ्यांचे नुकसान पाहून सरकार जागे होणार का?

या दुर्घटनेची शासनाने तातडीने दखल घेऊन महसूल आणि कृषी विभागामार्फत पंचनामे करावेत, नुकसानीचे वस्तुनिष्ठ मूल्यांकन करावे आणि बाधित शेतकऱ्यांना तातडीने आर्थिक मदत द्यावी, अशी मागणी शेतकरी संघटनेच्या वतीने करण्यात आली आहे. केवळ पंचनाम्याचे आश्वासन नको, तर प्रत्यक्ष मदत शेतकऱ्यांच्या हातात मिळावी, अशी अपेक्षा व्यक्त होत आहे.

घटनास्थळी दीपक दादा आलूरे, युवा सेनेचे राहुल मुळे, चंद्रकांत घुगे, गणेश देवशिंगकर, कृषी सहाय्यक अधिकारी पी. आर. जाधव, पोलीस पाटील जावेद शेख आणि अरविंद गायकवाड यांनी भेट देऊन नुकसानग्रस्त कुटुंबांचे सांत्वन केले. शिवसेना तालुकाप्रमुख अमोल जाधव यांनीही शासनाकडे तिन्ही शेतकरी कुटुंबांना तातडीने आर्थिक मदत देण्याची मागणी केली आहे.

आगीत ऊस जळाला; पण शेतकऱ्यांच्या आशा जळू देऊ नका! शासनाने तातडीने मदतीचा हात द्यावा, हीच नुकसानग्रस्तांची आर्त मागणी आहे.