राष्ट्रीय डिजिटल पशुधन अभियानातील उल्लेखनीय कामगिरीची राज्य शासनाकडून दखल; पशुसंवर्धन विभागाला उत्कृष्टता प्रमाणपत्र प्रदान

दुष्काळी परिस्थितीत पशुधन संवर्धन, कृत्रिम रेतन आणि दर्जेदार पशुवैद्यकीय सेवांच्या प्रभावी अंमलबजावणीचा गौरव!

धाराशिव : जिल्हा परिषद धाराशिवच्या शिरपेचात आणखी एक मानाचा तुरा रोवला गेला असून, जिल्ह्यातील पशुसंवर्धन विभागाने राष्ट्रीय डिजिटल पशुधन अभियानांतर्गत केलेल्या उल्लेखनीय कामगिरीची महाराष्ट्र शासनाच्या पशुसंवर्धन विभागाकडून विशेष दखल घेण्यात आली आहे. जिल्हा परिषद अध्यक्ष मा. सौ. अर्चनाताई राणाजगजितसिंह पाटील, उपाध्यक्षा मा. सौ. उषाताई रविंद्र गायकवाड, कृषी व पशुसंवर्धन सभापती मा. भाऊसाहेब खरसडे आणि मुख्य कार्यकारी अधिकारी मा. प्रियंवदा म्हाडदळकर यांच्या मार्गदर्शनाखाली जिल्ह्यात कृत्रिम रेतन, गर्भतपासणी आणि वासरांच्या जन्मासंबंधीच्या कामकाजाचे प्रभावी नियोजन, संनियंत्रण व अंमलबजावणी करण्यात आली. या उल्लेखनीय कामगिरीबद्दल डॉ. दीपक मुळे, उपआयुक्त, पशुसंवर्धन व दुग्धव्यवसाय, जिल्हा धाराशिव यांना उत्कृष्टता प्रमाणपत्र प्रदान करून गौरविण्यात आले आहे.
राज्यस्तरावर मिळालेला हा गौरव जिल्हा परिषद धाराशिवच्या पशुसंवर्धन विभागासाठी अभिमानाची बाब असून, पशुधन विकासाच्या क्षेत्रात जिल्ह्याने केलेल्या कामाची गुणवत्ता आणि प्रशासनाची कार्यक्षमता अधोरेखित करणारा आहे.
राष्ट्रीय डिजिटल पशुधन अभियानांतर्गत प्रभावी कामगिरी
राष्ट्रीय डिजिटल पशुधन अभियान (NDLM) अंतर्गत जिल्ह्यात कृत्रिम रेतन (AI), गर्भतपासणी (PD) व वासरांच्या जन्मासंबंधी (CB) कामकाजाचे प्रभावी संनियंत्रण आणि अंमलबजावणी करण्यासाठी जिल्हा पशुसंवर्धन विभागामार्फत नियोजनबद्ध प्रयत्न करण्यात आले.
दिनांक १ एप्रिल २०२६ ते २३ ऑक्टोबर २०२६ या कालावधीतील अभियानाच्या अहवालानुसार, प्रत्येक पशुवैद्यकीय चिकित्सालयासाठी प्रतिदिन ३ कृत्रिम रेतन करण्याचे निर्धारित उद्दिष्ट असताना, जिल्हा धाराशिवने प्रतिपशुवैद्यकीय चिकित्सालय प्रतिदिन सरासरी १.८९ कृत्रिम रेतन इतकी कामगिरी नोंदविली आहे.
जिल्ह्यातील पशुवैद्यकीय यंत्रणेच्या माध्यमातून कृत्रिम रेतन सेवांचे प्रभावी अंमलबजावणीकरण, क्षेत्रीय स्तरावरील कामकाजाचा नियमित आढावा आणि पशुपालकांना दर्जेदार प्रजनन सेवा उपलब्ध करून देण्यासाठी सातत्याने प्रयत्न करण्यात आले.

दुष्काळी परिस्थितीत पशुधन संवर्धनाला प्राधान्य
धाराशिव जिल्हा दुष्काळी परिस्थितीचा सामना करीत असताना पशुधनाचे संरक्षण, पशुपालकांना वेळेवर पशुवैद्यकीय सेवा आणि ग्रामीण भागातील पशुधन विकासाला चालना देणे ही प्रशासनासमोरील महत्त्वाची जबाबदारी आहे.
या पार्श्वभूमीवर पशुसंवर्धन विभागाने कृत्रिम रेतन सेवांची प्रभावी अंमलबजावणी, गर्भतपासणी, पशुधनाच्या प्रजनन क्षमतेत सुधारणा आणि पशुपालकांना आवश्यक सेवा उपलब्ध करून देण्यासाठी केलेले प्रयत्न विशेष महत्त्वाचे ठरले आहेत.
पशुधनाच्या माध्यमातून ग्रामीण अर्थव्यवस्थेला बळकटी देणे, पशुपालकांचे आर्थिक नुकसान कमी करणे आणि गुणवत्तापूर्ण पशुधन निर्मितीसाठी अनुकूल वातावरण निर्माण करणे, या व्यापक उद्दिष्टांच्या पूर्ततेसाठी विभागाने सातत्यपूर्ण कामकाज केले आहे.

उत्कृष्ट कामगिरीची राज्यस्तरावर दखल
जिल्ह्यातील पशुसंवर्धन सेवांची प्रभावी अंमलबजावणी, क्षेत्रीय कामकाजाचे नियमित संनियंत्रण आणि पशुपालकांना दर्जेदार प्रजनन सेवा उपलब्ध करून देण्यासाठी केलेल्या प्रयत्नांची दखल घेत महाराष्ट्र राज्याचे पशुसंवर्धन आयुक्त तथा महाराष्ट्र गोजातीय प्रजनन नियमन प्राधिकरण, पुणे यांच्या वतीने उत्कृष्टता प्रमाणपत्र प्रदान करण्यात आले.
हे प्रमाणपत्र म्हणजे जिल्ह्यातील पशुसंवर्धन विभागाच्या कामकाजाची गुणवत्ता, अधिकारी-कर्मचाऱ्यांचे योगदान आणि पशुधन विकासासाठी राबविण्यात येणाऱ्या उपक्रमांच्या प्रभावी अंमलबजावणीला मिळालेली राज्यस्तरीय पावती आहे.
राष्ट्रीय डिजिटल पशुधन अभियानातील ही उल्लेखनीय कामगिरी जिल्हा परिषद धाराशिवच्या शासकीय सेवांमधील गुणवत्ता, कार्यक्षमता आणि पशुपालकांप्रती असलेली बांधिलकी अधोरेखित करणारी असून, जिल्ह्याच्या विकासाच्या शिरपेचात आणखी एक मानाचा तुरा ठरली आहे.