औरंगाबाद विभाग पदवीधर मतदारसंघ निवडणूक

जिल्ह्यात एकूण २९ हजार १४५ मतदार : २२ हजार ७४५ पुरुष तर ६ हजार ४०० महिला मतदार

७६ मतदान केंद्रांवर होणार मतदान
सर्वाधिक ६ हजार ५८ मतदार उमरगा तालुक्यात
सर्वांत कमी १ हजार ७३७ मतदार परंड्यात

धाराशिव – औरंगाबाद विभाग पदवीधर मतदारसंघ निवडणूक २०२६ साठी जिल्ह्यातील मतदार यादीत एकूण २९ हजार १४५ पदवीधर मतदार मतदानाचा हक्क बजावण्यास पात्र आहेत.यामध्ये २२ हजार ७४५ पुरुष आणि ६ हजार ४०० महिला मतदारांचा समावेश आहे.जिल्ह्यातील आठही तालुक्यांत मिळून एकूण ७६ मतदान केंद्रांची व्यवस्था करण्यात आली आहे.येत्या २३ ऑक्टोबर रोजी होणाऱ्या मतदानासाठी जिल्हा प्रशासनाने आवश्यक तयारी केली आहे.

जिल्ह्यातील तालुकानिहाय मतदारसंख्येचा विचार करता उमरगा तालुक्यात सर्वाधिक ६ हजार ५८ मतदार आहेत.यामध्ये ४ हजार ७४९ पुरुष आणि १ हजार ३०९ महिला मतदारांचा समावेश असून,या तालुक्यात १२ मतदान केंद्रे आहेत. त्याखालोखाल धाराशिव तालुक्यात ५ हजार ७६५ मतदार असून,त्यामध्ये ४ हजार ३४८ पुरुष आणि १ हजार ४१७ महिला मतदार आहेत.धाराशिव तालुक्यात जिल्ह्यातील सर्वाधिक १६ मतदान केंद्रे निश्चित करण्यात आली आहेत.

तुळजापूर तालुक्यात एकूण ४ हजार ७१३ मतदार असून, त्यामध्ये ३ हजार ७५० पुरुष आणि ९६३ महिला मतदारांचा समावेश आहे.या तालुक्यात ११ मतदान केंद्रे आहेत.कळंब तालुक्यात ४ हजार ६० मतदार असून,त्यामध्ये ३ हजार १५७ पुरुष आणि ९०३ महिला मतदार आहेत.येथे १० मतदान केंद्रांची व्यवस्था करण्यात आली आहे.

लोहारा तालुक्यात एकूण ३ हजार ३१५ मतदार असून,त्यामध्ये २ हजार ५८५ पुरुष आणि ७३० महिला मतदारांचा समावेश आहे. या तालुक्यात ६ मतदान केंद्रे आहेत.भूम तालुक्यात १ हजार ७५० मतदार असून,त्यामध्ये १ हजार ४३१ पुरुष आणि ३१९ महिला मतदार आहेत.भूम तालुक्यात ८ मतदान केंद्रे निश्चित करण्यात आली आहेत.

वाशी तालुक्यात एकूण १ हजार ७४७ मतदार असून,त्यामध्ये १ हजार ३५२ पुरुष आणि ३९५ महिला मतदारांचा समावेश आहे. या तालुक्यात ५ मतदान केंद्रे आहेत.परंडा तालुक्यात जिल्ह्यातील सर्वांत कमी १ हजार ७३७ मतदार असून,त्यामध्ये १ हजार ३७३ पुरुष आणि ३६४ महिला मतदार आहेत.परंडा तालुक्यात ८ मतदान केंद्रांची व्यवस्था करण्यात आली आहे.

जिल्ह्यातील एकूण २९ हजार १४५ मतदारांपैकी पुरुष मतदारांचे प्रमाण सुमारे ७८.०४ टक्के,तर महिला मतदारांचे प्रमाण २१.९६ टक्के आहे.पुरुष मतदारांच्या तुलनेत महिला मतदारांची संख्या १६ हजार ३४५ ने कमी आहे. जिल्ह्यातील पदवीधर मतदारांच्या एकूण संख्येत उमरगा,धाराशिव आणि तुळजापूर या तीन तालुक्यांचा मोठा वाटा आहे.या तीन तालुक्यांमध्ये मिळून १६ हजार ५३६ मतदार आहेत.

पदवीधर मतदारसंघाची निवडणूक ही सुशिक्षित मतदारांना लोकशाही प्रक्रियेत थेट सहभाग नोंदविण्याची महत्त्वपूर्ण संधी आहे.शिक्षण,रोजगार,कौशल्यविकास आणि पदवीधरांच्या विविध प्रश्नांना विधानपरिषदेच्या माध्यमातून प्रतिनिधित्व मिळवून देण्याच्या दृष्टीने या निवडणुकीला विशेष महत्त्व आहे.त्यामुळे पात्र पदवीधर मतदारांनी आपल्या मतदानाचा हक्क बजावून लोकशाही बळकट करण्यासाठी योगदान देणे महत्त्वाचे ठरणार आहे.

जिल्ह्यातील आठ तालुक्यांमध्ये एकूण ७६ मतदान केंद्रे असून,सर्वाधिक १६ मतदान केंद्रे धाराशिव तालुक्यात,तर सर्वांत कमी ५ मतदान केंद्रे वाशी तालुक्यात आहेत. उमरगा येथे १२, तुळजापूर येथे ११,कळंब येथे १०, भूम व परंडा येथे प्रत्येकी ८ आणि लोहारा येथे ६ मतदान केंद्रे आहेत.

औरंगाबाद विभाग पदवीधर मतदारसंघ निवडणुकीच्या निमित्ताने जिल्ह्यातील २९ हजार १४५ पदवीधर मतदारांना आपला लोकशाही अधिकार बजावण्याची संधी मिळणार असून,२३ ऑक्टोबर रोजी होणाऱ्या मतदानाकडे जिल्ह्याचे लक्ष लागले आहे.