लातूर–तुळजापूर राष्ट्रीय महामार्गावर करजखेडा पाटीजवळ रविवारी भीषण आणि विचित्र अपघात घडून तीन जणांचा जागीच मृत्यू झाला, तर चार जण गंभीर जखमी झाले आहेत.

मिळालेल्या माहितीनुसार, भरधाव वेगातील बोलेरो वाहनावरील चालकाचे नियंत्रण सुटल्याने ही दुर्घटना घडली. नियंत्रण सुटलेल्या बोलेरोने प्रथम समोरून येणाऱ्या वॅगनआर कारला जोरदार धडक दिली. त्यानंतर बोलेरो पलटी होऊन रस्त्याच्या दुसऱ्या लेनमध्ये जाऊन स्विफ्ट कारवर आदळली.

या तिहेरी धडकेत अपघात अत्यंत भीषण झाला असून तीन जणांचा जागीच मृत्यू झाला. तसेच चार जण गंभीर जखमी झाले आहेत. जखमींना तातडीने उपचारासाठी धाराशिव व सोलापूर येथील रुग्णालयात हलविण्यात आले आहे.

दरम्यान, अपघाताची माहिती मिळताच पोलीस व स्थानिक नागरिकांनी घटनास्थळी धाव घेत मदतकार्य सुरू केले. या घटनेमुळे काही काळ महामार्गावरील वाहतूक विस्कळीत झाली होती.

पोलीस पुढील तपास करत आहेत.