प्रशांत शशिकांत मतेंराज्यातील नगरपालिका आणि नगर परिषद निवडणुकांबाबत आज मोठी घडामोड घडली आहे. नागपूर खंडपीठाने दिलेल्या महत्वाच्या आदेशामुळे उद्या नियोजित असलेली मतमोजणी रद्द करण्यात आली असून आता सर्वच नगरपालिका निवडणुकांचे निकाल 21 डिसेंबर रोजी जाहीर केले जाणार आहेत.
आज (2 डिसेंबर) राज्यातील विविध ठिकाणी मतदान पार पडत असताना उमेदवार आणि राजकीय पक्षांना धक्का देणारी ही माहिती समोर आली. पूर्वनियोजित कार्यक्रमानुसार 3 डिसेंबर रोजी मतमोजणी अपेक्षित होती. मात्र धाराशिव आणि उमरगा नगरपालिकेतील काही जागांवर दाखल झालेल्या न्यायालयीन आव्हानानंतर राज्य निवडणूक आयोगाने निवडणूक कार्यक्रमात सुधारणा केली. यामुळे मतमोजणीच्या तारखेवर संभ्रम निर्माण झाला होता.
निवडणूक आयोगाने 25 नगरपालिका व नगरपंचायतींच्या कार्यक्रमात बदल केले. परंतु 2 डिसेंबरला होणाऱ्या मतदानाची मतमोजणी 3 डिसेंबरलाच घ्यायची की पुढे ढकलायची याबाबत स्पष्टता नसल्याने प्रशासन आणि उमेदवारांमध्ये गोंधळाचे वातावरण होते.
या संदर्भातील सुनावणी आज उच्च न्यायालयात झाली. खंडपीठाने स्पष्ट आदेश देत सांगितले की 2 डिसेंबर रोजी झालेल्या मतदानासह 20 डिसेंबरला होणाऱ्या मतदानाच्या सर्व जागांची मतमोजणी एकत्रितपणे 21 डिसेंबर 2025 रोजीच घेण्यात येईल.
न्यायालयाच्या या निर्णयामुळे राजकीय पक्ष, उमेदवार आणि कार्यकर्त्यांमध्ये आश्चर्य आणि नाराजीची भावना निर्माण झाली आहे. आता जवळपास तीन आठवड्यांपर्यंत निकालाची प्रतीक्षा करावी लागणार असल्याने उमेदवारांच्या मानसिक ताणातही भर पडणार आहे.
या निर्णयामुळे राज्यातील राजकीय वातावरण पुन्हा तापण्याची चिन्हे आहेत आणि 21 डिसेंबर हा राज्यातील नगरपालिका निवडणुकांच्या निकालांचा निर्णायक दिवस ठरणार आहे.
