२५ पदांसाठी प्रक्रिया; पारदर्शकतेसाठी कडक नियम, सीसीटीव्ही देखरेखीखाली परीक्षा

धाराशिव : पोलीस अधीक्षक कार्यालय, धाराशिव यांच्या आस्थापनेवरील चालक पोलीस शिपाई (२५) पदांच्या भरती प्रक्रियेला वेग आला असून, मैदानी चाचणीत पात्र ठरलेल्या उमेदवारांची लेखी परीक्षा दि. ५ एप्रिल २०२६ रोजी सकाळी ११ वाजता आयोजित करण्यात आली आहे.ही परीक्षा रामकृष्ण परमहंस महाविद्यालय, तांबारी विभाग, धाराशिव येथे पार पडणार आहे. संबंधित उमेदवारांना महाआयटी विभागामार्फत प्रवेशपत्र पाठविण्यात आले असल्याची माहिती प्रशासनाकडून देण्यात आली.

▪️उमेदवारांसाठी कडक सूचनांची अंमलबजावणी
परीक्षा पारदर्शक व गैरप्रकारमुक्त पार पाडण्यासाठी प्रशासनाने कठोर नियमावली लागू केली आहे. उमेदवारांनी मैदानी चाचणी व लेखी परीक्षेची प्रवेशपत्रे तसेच पासपोर्ट आकाराचे फोटो सोबत आणणे बंधनकारक करण्यात आले आहे.तसेच उमेदवारांनी परीक्षा सुरू होण्याच्या किमान चार तास आधी म्हणजेच सकाळी ७ वाजता केंद्रावर हजर राहणे आवश्यक आहे. परीक्षेसाठी लागणारे काळ्या शाईचे बॉलपेन कार्यालयाकडूनच देण्यात येणार असून, इतर कोणतेही साहित्य नेण्यास मनाई आहे.

▪️इलेक्ट्रॉनिक वस्तूंवर बंदी; गैरप्रकारांवर कठोर कारवाई
परीक्षा केंद्रात मोबाईल, स्मार्टवॉच, कॅलक्युलेटर, डिजिटल डिव्हाइस, नोट्स, इअरफोन यांसारख्या कोणत्याही वस्तूंवर सक्त बंदी घालण्यात आली आहे. संपूर्ण परीक्षा प्रक्रिया सीसीटीव्ही व व्हिडिओ कॅमेऱ्यांच्या देखरेखीखाली पार पडणार असून, संशयास्पद हालचालींवर बारकाईने लक्ष ठेवले जाणार आहे.
कोणताही उमेदवार गैरमार्गाचा अवलंब करताना आढळल्यास त्याला तात्काळ अपात्र ठरवून महाराष्ट्र स्पर्धा परीक्षा अनुचित मार्ग प्रतिबंध अधिनियम 2024 अंतर्गत कारवाई केली जाणार असल्याचा इशारा देण्यात आला आहे.

▪️बाहेरगावच्या उमेदवारांसाठी निवास व्यवस्था
लेखी परीक्षेच्या आदल्या दिवशी म्हणजे दि. ४ एप्रिल २०२६ रोजी बाहेरगावाहून येणाऱ्या उमेदवारांसाठी आर. एस. करिअर अकॅडमी व बटालियन अकॅडमी, धाराशिव येथे निवास व्यवस्था करण्यात आली आहे.

▪️भरती प्रक्रिया पारदर्शक ठेवण्यासाठी प्रशासन सज्ज; गैरप्रकारांना शून्य सहनशीलता”