धाराशिव |( कळंब तालुका प्रतिनिधी) – कळंब तालुक्यातील मु.पो. खेर्डा (जि. धाराशिव) येथे अल्पभूधारक शेतकरी प्रभू संतराम भक्ते यांच्या घराला गुरुवारी (दि. 20 फेब्रुवारी 2026) दुपारी अचानक आग लागून मोठे नुकसान झाल्याची घटना घडली.
दुपारच्या सुमारास घरातून धूर निघताना दिसल्याने परिसरातील नागरिकांनी तत्काळ धाव घेतली. मात्र आगीने काही वेळातच रौद्र रूप धारण केल्यामुळे घरातील अन्नधान्य, कपडे, संसारोपयोगी साहित्य तसेच रोख रक्कम पूर्णपणे जळून खाक झाली. ग्रामस्थांच्या मदतीने आग आटोक्यात आणण्याचा प्रयत्न करण्यात आला.
या घटनेत सुदैवाने कोणतीही जीवितहानी झाली नसली तरी आर्थिकदृष्ट्या कमकुवत असलेल्या भक्ते कुटुंबाचे मोठे नुकसान झाले आहे. अचानक ओढवलेल्या या संकटामुळे कुटुंब उघड्यावर आले असून तातडीने आर्थिक मदतीची गरज निर्माण झाली आहे.
घटनेची माहिती महसूल प्रशासनाला देण्यात आली असून पंचनामा करण्याची प्रक्रिया सुरू असल्याची माहिती स्थानिकांकडून मिळाली. शासनाकडून तातडीची मदत मिळावी, अशी मागणी ग्रामस्थांकडून करण्यात येत आहे.